RC MNDEME APOKEWA RASMI OFISI ZA MKOA WA SHINYANGA, ATOA AGIZO LA WATOTO KURIPOTI SHULE

Posted on: March 1st, 2023

MKUU wa Mkoa wa Shinyanga, Mh. Christina Solomon Mndeme, leo Machi 1, 2023 amepokewa rasmi katika Ofisi za Mkoa wa Shinyanga baada ya kuteuliwa na Rais wa Jamhuri ya Muungano wa Tanzania, Mh. Dkt. Samia Suluhu Hassan, Februari 26, 2023.

Akitoa salamu za Serikali baada ya mapokezi mazuri, Mh. Mndeme aliwaomba wapokee salamu za upendo wa dhati kutoka kwa Rais wa Jamhuri ya Muungano wa Tanzania Mhe. Dkt. Samia Suluhu Hassan na kisha akawaomba ushirikiano ambao utapelekea uwajibikaji maridadi katika kazi huku akisisitiza mahusiano mazuri kazini kwa lengo la kustawisha maendeleo kwenye kazi na kuimarisha Utawala Bora kwa watumishi wa ngazi zote katika Mkoa.

“Naomba tupeane ushirikiano mzuri katika kazi, nipo tayari kushirikiana nanyi wakati wote, nami naombeni ushirikiano wenu kwa pamoja ulio na lengo la kujenga na pia niseme tuu kuwa Ofisi yangu ipo wazi wakati wote karibuni njooni tushauriane kwa lengo kuboresha na kutoa huduma iliyo bora kwa wananchi wetu," akisisitiza Mhe. Mndeme.

“Sisi ni kitu kimoja, tukuze mahusiano kazini maana hili ni jambo la muhimu sana, tuyaongeze mahusiano. Nikisikia mahali fulani hakuna mahusiano mazuri lazima nimuite mhusika na kumueleza. Tuendelee kuyadumisha mahusiano mazuri katika kazi ili tusije kuanza kunyosheana vidole.” amesema Mh. Mndeme.

Aidha, mbali na kuboresha mahusiano, Mh. Mndeme amewataka watendaji wote kuhakikisha jitihada za watoto kuripoti shuleni zinafanyika, akiamini kuna baadhi ya ambao hawajaripoti mpaka sasa.

“Naona kuna changamoto ya watoto kutoripoti shule, twendeni tukawatafute ili wapate elimu ambayo ni haki yao ya msingi, tukawatafute popote walipo kila Halmashauri ikawatafute watoto wote walipo ili wakaripoti mashuleni, ni lazima wakasome, penye changamoto tutasaidiana sababu mimi ni Mwalimu Mkuu wa Mkoa kwa sasa," amesema Mh. Mndeme.

Mkuu wa Mkoa wa Shinyanga amepokelewa na Katibu Tawala Mkoa Prof. Siza Tumbo, Kamati ya Usalama Mkoa, Wahe. Wakuu wa Wilaya za Shinyanga, Kishapu, Kahama, Makatatibu Tawala Wilaya, Wakurugenzi wa Halmashauri za Manispaa na Wilaya, Wakuu wa Divisheni, Vitengo pamoja na watumishi wengine mbalimbali wa ndani ya Ofisi ya Mkoa wa Shinyanga.

Mhe. Mndeme amepokea Ofisi kutoka kwa mtangulizi wake Mhe. Sophia Mjema ambaye aliteuliwa na Rais wa Jamhuri ya Muungano wa Tanzania Mhe. Samia Sukuhu Hassan kuwa Katibu wa Siasa, Itikadi na Uenezi wa Chama Cha Mapinduzi (CCM) Taifa Januari 2023.