Mtoto anastahili Cheti cha Kuzaliwa

Posted on: April 5th, 2017

Zoezi la kuwasajili na kuwapatia vyeti vya kuzaliwa bila malipo watoto wote walio na umri chini ya miaka 5 linaendelea katika kila ofisi za mtendaji wa kata na vituo vya afya vinavyotoa huduma ya mama na mtoto. Katika picha Bi.Evelyne Afisa Muuguzi Msaidizi katika kituo cha Afya cha Magereza, kilichopo mtaa wa Ushirika, kata ya Chamaguha, Manispaa ya Shinyanga akimkabidhi Bi. Esther Elias (Mzazi wa Loveness Juma Charles) cheti cha kuzaliwa baada ya kusajili katika daftari la usajili. Unaweza kuona mahojiano kati ya Afisa Muuguzi Msaidizi na Bi.Esther Elias wakati wa usajili wa mtoto kwa kubonyeza hapa.

Mara baada ya kusajili na kupokea cheti cha kuzaliwa wazazi huelemishwa kuwa cheti kinachotolewa ni halali kwa matumizi yoyote. Na pia cheti hakina ukomo wa matumizi ya mtoto hatalazimika kupata cheti kingine baada ya umri wa miaka 5. Kwa hiyo ni vema cheti kitunzwe mahali salama na kisikunjwe.

Mambo muhimu ya kuzingatia wakati wa usajili na utoaji wav yeti vya kuzaliwa ni kama ifuatavyo:

• Mzazi au mlezi anatakiwa kufika na kadi ya kliniki au tangazo la kuzaliwa mtoto au cheti cha ubatizo wa mtoto.
• Mzazi au mlezi afike na taarifa sahihi za jina la mtoto na majina matatu sahihi ya wazazi wa mtoto yaani baba na mama wa mtoto.

Umuhimu wa Cheti cha Kuzaliwa

• Ni utambulisho wa awali kisheria utakaomuwezesha mtoto kupata haki nyingine.
• Humsaidia mtoto kuandikishwa shule za msingi na sekondari.
• Kuzuia ajira ya watoto na kuwalinda watoto wanaokinzana na sharia.
• Kuwawezesha wanafunzi kujiunga na vyuo na elimu ya juu.
• Kupata mikopo ya elimu ya juu.
• Ni lazima ili kupata ajira katika taasisi za serikali na majenshi ya ulinzi na usalama.
• Ni kiambatanisho cha msingi ili kupata kitambulisho cha Taifa katika zoezi linaloendelea nchini.
• Husaidia kupata hati ya kusafiria (Passport)

Wakati huo huo Mkurugenzi wa Manispaa anaendelea kutoa wito kwa wananchi wote kuwaleta watoto wote walio na umri chini ya miaka 5 ili wasajiliwe na kupewa vyeti vya kuzaliwa. Baada ya muda serikali itaanza zoezi la ukaguzi wa kubaini watoto wote chini ya umri wa miaka 5 ambao hawana vyeti vya kuzaliwa na kuchukua hatua stakihi dhidi ya wananchi waliokaidi kuwapatia haki ya kupata cheti cha kuzaliwa.

“Mtoto anastahili cheti cha kuzaliwa, Mpe haki yake”