WACHUKULIENI HATUA WAKANDARASI AMBAO HAWATAKAMILISHA MIRADI NDANI YA MUDA”- MHE. MWEBEA.

Posted on: January 24th, 2025

Kamati ya fedha na utawala Halmashauri ya Manispaa ya Shinyanga leo Januari 24, 2025 imefanya ziara ya Kutembelea na kukagua miradi ya maendeleo inayotekelezwa ndani ya Manispaa hii kwa kipindi Cha robo ya pili ya mwaka wa fedha Oktoba hadi Disemba 2024/2025.

Akizungumza kwenye hii Naibu Meya wa Halmashauri ya Manispaa ya Shinyanga Mhe. Zamda Mwebea amewataka wahandisi wa manispaa ya shinyanga kuwachukulia hatua ikiwa ni pamoja na kuwasitishia mikataba wakandarasi wote ambao hawatokamilisha miradi ya maendeleo ndani ya muda uliopangwa.

Mhe. Mwebea ametoa maelekezo haya wakati akiwa kwenye ziara ya kamati ya fedha na utawala ya Manispaa ya Shinyanga iliyofanya ziara ya kutembelea na kukagua miradi ya maendeleo inayotekelezwa ndani ya manispaa kwa kipindi cha robo ya pili (Oktoba hadi Disemba) kwa mwaka wa fedha (2024/2025) iliyofanyika leo januari 24,2025

na kuwataka wakandarasi wote Kuhakikisha miradi inakamilika ndani ya muda walio omba wa ziada ili huduma ziweze kutolewa kama ilivyo pangwa kwenye miradi hiyo.

“Wakandarasi wote mlioomba muda wa ziada hakikisheni mnakamilisha ndani ya muda , hapa nyuma mliomba kuongezewa muda kwa sababu hali ya hewa hususani Mvua kwa kipindi hicho ilikua nyingi pamoja na changamoto ya upatikanaji wa vifaa vya ujenzi, niwatake basi wahandisi wa manispaa wasimamieni wakandarasi hawa wajenge kwa wakati huku mkizingatia ubora wa miradi kama ilivyopangwa na serikali, hatutakubali tena mkandarasi baada ya muda huo kuomba muda tena wa ziada kwa kipindi cha pili zaidi ya kuwachukulia hatua stahiki ikiwa ni pamoja na kuvunja mikataba yao”. Amesema Mhe. Mwebea.

Kamati ya Fedha na utawala imetembelea na kukagua jumla ya miradi sita ikiwemo Ujenzi wa jengo la utawala la Manispaa ya Shinyanga, ujenzi wa Mabweni manne na matundu ya vyoo 12 katika shule ya Sekondari Rajani kata ya Ibadakuli, ujenzi wa nyumba ya walimu Shule ya Sekondari Butengwa kata ya Ndembezi, ujenzi wa madarasa matatu na matundu ya vyoo shule ya msingi ndala “B” kata ya Ndala pamoja na ujenzi wa Shule mpya ya sekondari iliyopo kata ya Kizumbi.