SNATUS AFUNGA MAFUNZO YA MFUMO WA FFARS KWA WATENDAJI MANISPAA YA SHINYANGA

Posted on: September 23rd, 2023

SNATUS AFUNGA MAFUNZO YA MFUMO WA FFARS KWA WATENDAJI MANISPAA YA SHINYANGA

Na. Shinyanga Mc

Kaimu Mkurugenzi wa Manispaa ya Shinyanga Ndg. Kuchibanda Snatus leo tarehe 23 Septemba, 2023 amefunga Mafunzo ya Mfumo wa FFARS kwa Watendaji yaliyoanza jana tarehe 22 Septemba, 2023 na kumaliza leo katika ukumbi wa Lewis Kalinjuna uliopo katika ofisi za Manispaa ya Shinyanga.

Akizungumza katika kufunga mafunzo haya Ndg. Snatus amewataka watendaji kwenda kutumia Mfumo wa FFARS ili kuimarisha usimamizi mzuri wa fedha za Umma, kuunganisha taarifa za fedha za Serikali ( Final Accounts) pamoja kupata taarifa mbalimbali za fedha zenye usahihi.

Aidha, Ndg. Snatus amewasisitiza Watendaji kwenda kuzingatia Sheria na Kanuni za Fedha za Umma na kufuata Sheria ya Manunuzi ya Umma wakati wanapofanya malipo ili kujiepusha na hoja za ukaguzi na wakati mwengine kuepuka kuingia kwenye migogoro ya kiutumishi.

Pamoja na mambo mengine, Ndg. Snatus amewataka Watendaji kwenda kusimamia vizuri miradi ya maendeleo, kutatua kero za Wananchi, kusimamia Watumishi walioko chini yao kwa kudhibiti utoro na utovu wa nidhamu, kudhibiti utoro kwa wanafunzi, kutokomeza mimba kwa wanafunzi, kusimamia usafi wa mazingira na kudhibiti kuzagaa kwa mifugo pamoja na kusimamia uhamasishaji wa utoaji wa chakula cha mchana kwa wanafunzi.

Mfumo wa FFARS kwa watendaji wa Kata,Mitaa pamoja na Vijiji unaenda kuwarahisishia kufanya kazi kwa urahisi katika kupokea fedha , kuandaa taarifa za fedha, kufanya malipo mbalimbali wanapofanya miradi ya maendeleo.