RC MACHA AONGOZA ZOEZI LA UPANDAJI MITI SIKU YA KUMBUKIZI YA KUZALIWA RAIS MHE. DKT. SAMIA SULUHU HASSAN.

Posted on: January 27th, 2025

Mkuu wa mkoa wa Shinyanga Mhe. Anamringi Macha ameongoza zoezi la upandaji miti, zoezi lililoasisiwa na shirika la utangazaji Tanzania (TBC) ikiwa ni kumbukizi ya kuzaliwa kwa Rais wa Jamhuri ya muungano wa Tanzania Mhe. Dkt. Samia Suluhu Hassani zoezi ambalo hufanyika kila ifikapo januari 27 ya kila mwaka.

Zoezi hili kimkoa limefanyika leo Januari 27, 2024 katika shule ya Msingi mapinduzi “A” na “B” kata ya Ngokolo Halmashauri ya Manispaa ya Shinyanga.

Akizungumza katika zoezi hili la upandaji miti Mhe. Macha amewasihi wananchi wa mkoa wa Shinyanga kuyaenzi maono ya Mhe. Rais ya Kuhakikisha Tanzania inakuwa ya kijani ili kukabiriana na mabadiliko ya tabianchi.

“Zoezi hili ni kuunga mkono jitihada za dhati zinafanywa na Serikali katika kukabiliana na mabadiliko ya tabianchi, kimkoa zoezi hili la upandaji miti tumeona ni vyema tulifanye hapa Manispaa ya Shinyanga kwa sababu ni moja ya Manispaa inayofanya vizuri katika swala zima la utunzaji na usafi wa mazingira kitaifa na sisi kama mkoa tumeona ni vema kuendelea kuipendezesha halmashauri hii kupitia upandaji miti.” Amesema Mhe. Macha.

Kwa upande wake Mstahiki Meya wa Halmashauri ya Manispaa ya Shinyanga Mhe, Elias Masumbuko amemhakikishia Mkuu wa Mkoa wa Shinyanga kuendelea kuitunza miti hii ikiwa ni pamoja na kuwachukulia hatua kali kwa wale wote watakao kata miti pamoja na kuzuia mifugo katika maeneo yote ya mijini.

Naye kaimu mkuu wa kitengo cha maliasili na utunzaji wa mazingira halmashauri ya manispaa ya shinyanga Ndg, Ezira Manjerenga amesema jumla ya miti miatano imepandwa katika shule hizi mbili huku jumla ya miti elfu tano inagawiwa kwa wakazi wa manispaa hii ili kutekeleza adhima ya Serikali ya kupanda miti miliomi moja na laki tano kwa kila mwaka.