MANISPAA YA SHINYANGA YAADHIMISHA SIKU YA MISITU DUNIANI KWA KUPANDA MITI

Posted on: March 21st, 2025

Halmashauri ya manispaa ya shinyanga Katika kuadhimisha siku ya misitu  sambamba na Siku ya upandaji miti kitaifa imepanda na kugawa jumla ya miche 1200 ya matunda na kimvuri katika soko la wazi mnada wa wajasiliamali wadogowadogo lililopo mtaa wa Dome kata ya Ndembezi Halmashauri ya manispaa ya shinyanga.

Akizungumza katika zoezi hili la upandaji miti Mkuu wa Idara ya Maliasili  na mazingira Manispaa ya Shinyanga Ndg. Ezra Manjerenga amesema kwa kutambua umuhimu wa utunzaji miti na mazingira uongozi wa manispaa ya shinyanga umepanda miti ya kimvuri na matunda katika eneo soko la wazi (MNADA) lililopo mtaa wa dome kata ya ndembezi huku akiwataka wananchi na wafanyabiashara kuitunza ili iweze kukua.

“Uongozi wa manispaa ya shinyanga katika kuadhimisha siku ya misitu duniani umeamua kupanda miti hii ya kimvuri na matunda katika eneo hili la mnada, rai yangu kwa wajasiliamali katika eneo hili tuitunze ili iweze kukua na kutoa matunda na kukabiliana na mabadiliko ya tabia nchi, lakini nitoe wito kwa wananchi wa manispaa ya shinyanga kufika ofisi ya Mkurugenzi wa manispaa ya shinyanga kuchukua miche ya miti ambayo inatolewa bure”. Amesema Ndg. Majerega

Katika hatua nyingine Ndg. Manjerenga  amesema manispaa ya shinyanga imetunga sheria ndogo  ya usafi wa mazingira dhidi ya waharibifu wa mazingira kwa kukata miti hovyo ambapo faini ni Tshs 50,000 hadi Tshs 300,000 au kifungo jela miezi sita.