MADIWANI MANISPAA SHINYANGA WATOA TAMKO DHIDI YA VITENDO VYA UKATILI KWA WATOTO

Posted on: February 11th, 2023

MADIWANI wa Halmashauri ya Manispaa ya Shinyanga wametoa tamko la kulaani vitendo vya ukatili wa kijinsia dhidi ya watoto wadogo, ambavyo vinaendelea ndani ya jamii, yakiwemo matukio ya ubakaji na ulawiti.

Tamko hilo wamelitoa Februari 10, 2023 kwenye kikao cha Baraza la Madiwani wakati akichangia Taarifa ya Kamati ya Uchumi, Afya na Elimu kilichofanyika katika Ukumbi wa Lewis Kalinjuna uliopo Manispaa ya Shinyanga.

Wamesema matukio ya ukatili dhidi ya watoto Katika Manispaa ya Shinyanga yamekithiri, hivyo elimu inapaswa kuendelea kutolea kwa wananchi kuachana na vitendo hivyo ili kuto waathiri watoto kisaikolojia na kushindwa kutimiza ndoto zao.

Mwenyekiti wa Kamati hiyo ya Uchumi Afya na Elimu, Shela Mshandete, alisema inaumiza sana kuona watoto wadogo wakiendelea kufanyiwa vitendo vya ukatili wa kijinsia, tena wakifanyiwa na watu ambao ni wa karibu.

“Tushikamane madiwani na kutoa Tamko la kulaani matukio ya ukatili dhidi ya watoto wadogo, na ajenda hii ya kupinga ukatili iwe ya kudumu tuzungumza kwenye mikutano yetu yote ikiwamo ya hadhara ili Shinyanga kusiwepo na ukatili tena,”amesema Shela.

“Tunaliomba pia Jeshi la Polisi kesi za ukatili zikifika kwenye dawati lao wazishughulikie kikamilifu ili wahusika wachukuliwe hatua kali za kisheria, na siyo kuzisuluhisha kimya kimya,”aliongeza.

Ametoa wito pia kwa wananchi kila mmoja awe mlinzi wa mwenzake, ili kuhakikisha watoto wanalindwa dhidi ya vitendo vya ukatili wasome na kutimiza ndoto zao.

Katika hatua nyingine alisisitiza suala la watoto kula chakula shuleni na kuwaomba wazazi wachangie chakula kila mmoja debe moja la unga na kilo 4 za sukari, ambapo mwanafunzi atakula mwaka mzima, na kusoma bila ya kuwa na njaa na hatimaye kufanya vizuri kitaaluma.

Aidha katika Baraza hilo ziliwasilishwa taarifa za Kamati ikiwamo Kamati ya Ukimwi, Kamati ya fedha na Utawala, na Kamati ya Uchumi Afya na Elimu, na kujadiliwa mambo mbalimbali ikiwamo upungufu wa matundu ya choo shuleni.

Naye Mkurugenzi wa Manispaa ya Shinyanga, Ndg. Jomaary Satura, akiwasilisha taarifa yake kwenye Baraza hilo, alieleza kuwa, changamoto zote ambazo zimewasilishwa watazifayika kazi na zingine zipo kwenye utekelezaji, huku akisisitiza kwamba hali ya mwenendo ya utendaji katika halmashauri inazidi kuimarika kutoka na kuwepo kwa uwazi na uwajibikaji.

Satura aliongeza kwa kusema Halmashauri itaendelea na kasi ya ukusanyaji wa mapato ya ndani, fedha ambazo zitatumika kutekeleza miradi mbalimbali ya maendeleo kwa wananchi.