DC MTATIRO AZINDUA MASHINDANO YA MPIRA WA WAVU KANDA YA ZIWA MAGHARIBI.

Posted on: July 29th, 2024

DC MTATIRO AZINDUA MASHINDANO YA MPIRA WA WAVU KANDA YA ZIWA MAGHARIBI.

Na. Shinyanga MC

Mkuu wa wilaya ya Shinyanga Wakili Julius S. Mtatiro amezindua kashindano ya mpira wa wavu kanda ya ziwa Magharibi yanayohusisha timu kutoka mikoa minne ambapo

mashindano hayo yamefanyika leo Juni 29, 2024 katika viwanja vya Sabasaba vilivyopo manispaa ya Shinyanga mkoani Shinyanga.

Akizungumza wakati wa uzinduzi wa mashindano hayo Wakili Mtatiro ametoa wito kwa wadau wa michezo kuendelea kuunga mkono mchezo wa mpira wa wavu kama ilivyo kwenye michezo mingine.

“Kwanza niwakaribishe katika wilaya ya Shinyanga, ujio huu unatupatia chachu ya kufanya maboresho kwenye viwanja vyetu vya michezo, kwa niaba ya serikali niwatakie kheri ya mashindano haya na yajayo kwa timu ambazo zitafanikiwa kufuzu kwenda kushiriki mashindano ya kitaifa, lakini pia niendelee kutoa wito kwa wadau wa michezo kuweka nguvu kwenye mpira huu wa wavu kwani mpira huu ni mzuri na umetoa fulsa za ajira kwa vijana wengi”, amesema DC Mtatiro.

Kwa upande wake Mwenyekiti wa Mpira wa wavu kanda ya ziwa magharibi Ndg. Jason Rwekaza amesema lengo la mashindano hayo ni kutafuta timu mbili zitakazo kwenda kushiriki kwenye michuano ya kitaifa itakayohusisha timu 14 wanaume na 10 wanawake kutoka kutoka kanda zote hapa nchini.

“Michuano hii ni kwaajili kutafuta washindi wawili wa kwenda kushiriki mashindano ya Tanzania Volleyball National League - TVNL inayotarajia kuanza tarehe 22/07/2024 huko jijini Dar es salaam”, amesema Ndg. Rwekaza.

Naye Katibu mkuu wa chama cha mpira wa wavu Tanzania Ndg. Laurence Safari amesema mashindano hayo ya kanda ya mpira wa wavu yatatoa nafasi kwa washindi kwenda kushiriki mashindano ya kitaifa lakini pia mshindi wa kitaifa atafuzu kwenda kushiriki mashindano ya ligi ya mabingwa ya mpira wa wavu na kuongeza kuwa dhamira ya mashindano hayo ni kuinua mpira wa wavu hapa nchini.